非法餵野鳥 禽流殺埋身

「周圍都係雀屎，公園有、連捉棋嗰度都有，真係好唔衞生！」陸小姐指馬頭圍邨近日常有鳥群聚集，對街坊造成困擾，「依家連衫都唔敢晾出去，仲試過飛入屋搵食！」陸認為雀鳥數目大增與附近有人非法餵鳥有關，「見過有人拎住袋麵包邊行邊丟，同房署、食環署講過好多次都冇用！」

花圃等開餐 數目驚人

據了解，懷疑非法餵野鳥者近日已將「餵飼範圍」由馬頭圍邨擴展到馬頭涌道、甚至譚公道一帶，街坊方小姐直指在花圃「等食」的野鳥數目驚人，情況幾近失控，「最少都有幾十隻鴿，仲唔驚人o架！」

野烏糞便可傳染致命惡疾，醫生警告市民勿亂碰。

馬頭圍邨內常有雀鳥聚集，食物與雀糞遍地皆是。

當區區議員莫嘉嫻證實曾接獲多宗投訴，「餵到愈嚟愈多雀，唔衞生又驚有禽流，而且啲雀畀人餵慣就唔識得搵食，對人同雀都冇好處！」莫直斥房署及食署執法力度欠奉，要求加緊清潔及消毒轄下範圍，並加強宣傳，令市民知悉危機。

懷疑餵野鳥人士將麵包碎放在花槽，吸引野鳥進食。	黎小姐：「我都試過中雀屎！雀屎有咁多菌，梗係唔建議亂餵雀，都有教小朋友唔好餵雀！」	余女士：「餵雀嘅多數都係老人家，話佢又唔係咁好！依家搞到愈嚟愈多雀！」

馬頭圍邨物業服務辦事處發言人表示，就邨內疑有人非法餵野鳥一事，職員在過去數月已加強管制行動及宣傳，包括加緊清潔及於邨內張貼通告，房署亦加派特遣隊監察。發言人重申，凡違規餵飼致弄污公眾地方者，可罰款一千五百元；如證實屬邨內住戶，更會在房署屋邨管理扣分制下被扣五分。過去一年該邨共接獲六宗相關投訴，曾作多次口頭勸喻及一次書面警告，經勸喻後有關人士已經停止餵飼。

食物環境衞生署發言人則說，接獲轉介後曾作巡查，期間發現有巿民餵飼野鳥並弄污公眾地方，已發出定額罰款通知書並張貼告示，提醒巿民切勿以身試法。

「一定唔可以亂餵雀，就算有需要接觸都要帶手套同口罩，之後仲要即刻清潔消毒！」家庭醫生關嘉美警告，禽鳥糞便可傳染禽流感及鸚鵡熱等疾病，感染禽流感的致命率亦相對為高，呼籲巿民須提高警覺，「（禽流感）病徵同感冒發燒差唔多，好多人中咗招都唔覺，遲咗睇醫生就好危險！」

記者：朱廣華

攝影：伍思明