如果講大話真係會甩大牙，前特首曾蔭權爵士嘅牙醫就發達啦，甩完一隻補一隻，甩完一打補一打，收錢收到手軟，想窮都難呀。如果講大話真係會鼻哥長，貪曾嘅整容醫生都好過癮o架，鼻哥一長就切，切完當然要動手術整容啦，賺錢潛力簡直係無可限量。
冇錯，貪曾真係好鬼死鍾意講大話，絕對係「行騙長官」嘅佼佼者。就以搭乘星島新聞集團主席何柱國等富豪嘅遊艇豪遊濠江為例，當日被東方報業集團揭發醜聞之後，貪曾死撐話喎，當作一般渡輪畀咗五百元交通費。先唔計區區五百元夠唔夠應付超級遊艇嘅龐大開支，呢筆錢到底有冇畀呢？答案係冇嘅，海事處調查一年之後證實，當日船東或船長冇收取任何費用。簡單咁講，曾蔭權，你呃人！
早前向廉署舉報貪曾嘅市民莊先生，得悉所謂畀船費純屬一派胡言，日前再次向廉署舉報，同時舉報前廉政專員湯顯明在任時包庇貪曾。消息指廉署已就貪曾懷疑冇畀船費一事立案調查，至於涉及湯顯明嘅舉報就唔立案喎。
話時話，曾蔭權被揭發連串貪腐醜聞已經一年嘞，廉署到底查成點o架？係咪真係想包庇到底然後不了了之？成件事無法唔令人質疑，當日超齡仍然受到曾蔭權重用續約三年做廉政專員嘅湯顯明，根本就係官官相衞。好衰唔衰湯顯明自己都其身不正，最近就有人舉報佢以權謀私。
舉報人翻出湯顯明舊帳，呢位廉署一哥在位五年期間，最少涉及五宗罪，不但經常外訪大花筒，其中一次帶同六名下屬去北非摩洛哥公幹十日，全程乘搭商務客位，耗用公帑六十萬元。有一次外訪上海仲離譜，竟然出現正副專員同時離港嘅真空局面，搞到ICAC好似無人駕駛咁嘅款。舉報人就話嘞，湯顯明經常去內地無非想攀龍附鳳拉關係，為退休鋪路北上神州攞着數。
咁都唔止o架，湯顯明亦被質疑越過正常程序，未經公開招聘嘅情況之下，以年薪百萬元聘請內地學者袁柏順出任廉署轄下廉政建設研究中心合約顧問，仲將招聘工作交由一個內地研究學會負責，都唔知佢有乜嘢動機。
其實講到尾，如果現任廉政專員白韞六唔想被視作第二個湯顯明，亦唔想親手打爛廉署得來不易嘅金漆招牌，咁就要依法辦事，理得佢係過氣特首定係過氣專員，總之秉公處理遇佛殺佛！
嗱，有一件事大家不可不知，原來見義勇為舉報貪曾嘅莊先生，近日收到匿名電話恐嚇。喂，廉署保密，密密實實，講嘅就係保障舉報人免受滋擾甚至報復，家陣莊先生受到恐嚇，條數點計先？
計功夫茶話齋，如果香港要保持全球數一數二嘅反貪地位，貪官必須法辦，舉報不容滋擾！