政府對係咪增發免費電視牌照遲遲未表態，之前泛民主派議員就此提出動議，要求政府承諾喺去年底前發牌，點知工程界盧偉國就將動議修訂為政府要喺今年三月底前作出決定，令人揣測有關修訂其實係政府背後出手，三月就會有分曉。不過，最近就有傳特首梁振英（CY）會喺下月中約見資訊科技界人士傾免費電視發牌問題，如果順利發牌嘅話，照道理就唔使傾，莫非發牌又有暗湧？
CY下月約見一眾資訊科技界代表傾免費電視牌照，其實同盧偉國修訂喺三月底前就發牌作出決定嘅時間不謀而合。資訊科技界議員莫乃光就證實，CY約佢同業界喺下個月十二日見面，但就未知約咗邊啲人，亦冇講到會傾啲咩嘢喎。我哋都打過畀有份申請免費電視牌照嘅城市電訊主席王維基，但佢就話唔會評論。
照道理如果政府諗住三月底發牌嘅話，應該就冇咩需要再傾啦，除非係政府決定唔發牌，所以要同大家解畫，又或者係三月都未決定到，需要押後處理，莫非今次免費電視發牌真係凍過水？