政情：林健鋒大嘆無力攞飛
英超勁旅曼聯暑假來港獻技，但四萬張門票只得一萬八千張係公開發售，其餘門票被唔同機構留起晒，惹起全城撲飛熱潮。由於今次曼聯來港獲盛事基金撥款八百萬元資助，搞到盛事基金主席林健鋒（Jeffrey）成為眾矢之的，點知Jeffrey話今次門票發放係球隊「傑志」負責，佢身為主禮嘉賓都係得自己一張門票，所以朋友問佢有冇免費飛，佢都無奈托手o架。
監管有冇派精兵落場
Jeffrey話，一萬八千張門票喺香港公開發售，呢個數字已經比大球場同級別賽事為高，而且其餘門票亦係公開發售，只不過唔係賣畀香港市民，包括留畀旅遊發展局、曼聯及本地球圈。
所以Jeffrey話唔少老友問佢有冇門票，佢都唔好意思要話無能為力，最多只能夠幫班老友排隊買飛喎。今次另一為人詬病係公開發售門票全部係山頂位，靚位就被人內部認購晒，Jeffrey就話呢方面佢都控制唔到。不過，盛事基金有權監管曼聯有冇派精兵落場，如果曼聯只係派後備落場應酬球迷，盛事基金可能扣除部分贊助。