政情：泛民賊過興兵

遲到早退睇漏魔鬼條文

《公司條例》附屬法例小組委員會最新名單入面，上屆有份漏招嘅公民黨湯家驊、民主黨何俊仁（鐵頭仁）同涂謹申都有加入，其中泛民成員更由四個增至七個。還記得幾位大狀當年審議有關草案時不但走漏眼任由條例通過，有時更連會都懶得開，其中鐵頭仁同涂謹申更喺四次關鍵會議中缺席咗兩次會議，湯家驊則遲到早退兼唔出聲，唔怪得睇唔到啲魔鬼條文啦！最離譜係佢哋事後仲喺度批評，依家先至嚟補鑊。

講番個小組委員會名單，除咗工業界梁君彥冧莊加入外，部分可謂雜牌軍雲集，好似有漁農界議員何俊賢、為人師表嘅公民黨陳家洛、資訊科技界莫乃光等。《公司條例》引起軒然大波，多位議員為表「積極關注」事件，梗係爭住加入委員會博表現啦，就連近月以「獅吼功」極速上位嘅蔣麗芸都湊熱鬧加入，如果大家為條例走漏眼而互抽後腳，相信呢個委員會一定好戲連場。

不過，最好笑嘅係，關乎限制查冊嘅惡法其實五月先至提交立法會，各位議員咁早就蜂擁加入委員會，諗住盡快補鑊，似乎係表錯情囉！《公司條例》附屬法例最終能否加入豁免傳媒查閱公司資料條款仲未知，據聞政府喺呢方面一直持開放態度，但亦有記者團體唔收貨，強烈要求修改主體法例，最終呢單嘢點收科，大家拭目以待。