中環出更:唐媽媽避談新抱被起訴

仁濟醫院董事局尋日舉行新春酒會,數以百計政商界名人齊聚,包括前政務司司長唐英年母親唐尤淑圻都去湊熱鬧。悉心打扮嘅唐媽媽心情勁靚,事關佢喺外國居住嘅子女都返香港過農曆新年。不過,問起佢新抱、唐英年太太郭妤淺因僭建被起訴,唐媽媽即刻收起笑容,連聲話唔知,離去時仲喺工作人員護送下,兜路避過記者嘅咪高峰陣,同以前出聲力撐阿仔嘅態度截然不同。

唐媽媽係仁濟顧問局主席,對仁濟活動一向瞓身支持,但近年唐家是非多多,唐唐又神出鬼沒,傳媒惟有追住經常出席公開場合嘅唐媽媽。佢透露,今個農曆新年,唐唐都一齊留港團年,幾日前先至出門去旅行,對於阿仔有望當選全國政協常委,唐媽媽坦言好開心。

單日堅感謝鄭承隆

除咗唐媽媽外,教育局局長吳克儉都有出席,卓妮問番佢年初七「人日」為何現身攝太歲勝地蓬瀛仙館,佢揭開謎團話,原來係應朋友邀請去食齋,強調係各自畀錢,仲話做官小心啲好,睇嚟佢愈來愈明白官場嘅生存之道。

至於同仁濟主席鄭承隆好老友嘅單日堅都一早到場,講起上周末鄭承隆出手競投近似懲教署英文縮寫嘅「CSD HK」自訂車牌時,單日堅猛話好感謝,仲話要多謝本報披露消息,先至令事件圓滿落幕喎。

咁啱尋日中聯辦新界工作部喺同一場地接力舉行新春酒會,好多立法會議員喺開會中途出來走兩場,包括田北辰、陳恒鑌等。

大約下午五點半,譚耀宗更加拉隊浩浩蕩蕩到場,包括李慧琼、陳克勤及梁志祥等,何俊賢話大家約埋一齊到,打完招呼就會重返立法會喎。

卓妮

第一手消息請下載on.cc東方互動iPhone/iPad/Android/Windows Phone Apps