槍械管制呢家嘢，最近喺美國掀起口水花四濺嘅連場辯論，唔係小辯，簡直大辯。無他嘅，美國槍械氾濫成災，一不留神就砰砰砰砰血洗校園，亂槍掃射之下生靈塗炭，梗係令人覺得有管制槍械嘅必要啦。問題係美國憲法講到明人民擁有槍械係不可侵犯嘅權利，而且擁槍派堅持荷槍實彈先至能夠有效阻止變態槍手大開殺戒。
睇情況，香港如果唔盡快小辯、大辯甚至激辯一下槍械管制，遲早會學似美國咁一塌糊塗。功夫茶講嘅唔係真槍，而係具備相當威力嘅氣槍。喂，千祈唔好睇小氣槍呀，若然改裝到火力超強，氣槍一樣有殺傷力o架。情況就好比橡膠子彈，近距離射擊絕對有機會致命。
根據香港現行法例，氣槍子彈嘅動能不准超過二焦耳，若然改裝至二焦耳以上就等同於非法藏械，最高刑罰係監禁十四年。之不過咁，如果警方懶於執法，改裝氣槍其實話都冇咁易。
上個月喎，天水圍驚現氣槍狂徒，將途人當作活靶亂咁射，後來又接二連三有小巴同巴士分別喺屯門同北角受到氣槍狙擊。以槍擊案造成嘅破壞力估計，香港氣槍射擊會副會長余志樑就認為嘞，有關氣槍嘅威力隨時高達五焦耳以上。
有一位本身亦係氣槍玩家嘅警務人員透露，部分氣槍嘅仿真度係九成九，改槍可以話係零難度。點改呢？一係請教氣槍店職員啦，一係上網自學DIY啦，套用國家領導人嘅金句，只要精神不滑坡，辦法總比困難多。
講到呢度，有一個小故事不妨同大家分享。功夫茶最近去探一位朋友喎，見到佢屋企嘅玻璃窗出現裂痕，好奇問佢發生乜嘢事啦，佢話喎，唔排除有人貪玩用氣槍亂咁射。
好嘞，大家贊唔贊成管制氣槍呢？你知啦，小時偷針大時偷金，玩氣槍如果玩到要射穿人哋玻璃窗先至過癮，難保日後唔會揸住支真槍打劫銀行喎。即使唔係真槍，揸住支仿真度九成九嘅氣槍衝入銀行，嗰種場面已經足以令人嚇破膽啦！
立法會保安事務委員會成員黃國健係咁講嘅，本港有關氣槍管制法例過於寬鬆，而且不合時宜，係時候檢討嘞。黃國健認為，近年氣槍性能大躍進，接連發生氣槍狙擊案反映問題已失控，首要取締高性能同可改裝嘅氣槍，另外政府亦可考慮將改槍列為刑事罪行，藉此提高阻嚇性。
計功夫茶話齋，防患於未然一定冇錯，即使以現行法例衡量，氣槍改裝到二焦耳以上已經係非法藏械啦，警方闊佬懶理咪即係助紂為虐囉。總而言之，香港需要槍械管制，而且執法人員唔能夠繼續胡胡混混！