自稱屬龍嘅教育局局長吳克儉去年犯太歲，咁啱佢就因為推行德育及國民教育科搞到一鑊泡，真係唔知佢去年初有冇去攝太歲。不過，我哋就收到風，話吳克儉喺上星期六，即係農曆年初七「人日」下午去咗著名攝太歲嘅粉嶺蓬瀛仙館。吳克儉今年唔係犯太歲，照道理就唔使去攝太歲，莫非佢去還太歲？但按照習俗應該要喺冬至到立春前還太歲，究竟佢去做乜呢？到此一遊？
蓬瀛仙館每年都吸引唔少善信去參拜，就連吳克儉都喺人日山長水遠入去，當日有人見佢着恤衫冇打呔，而且兩手空空。照道理吳克儉蛇年冇犯太歲，但本港教育問題多籮籮，除咗北區學校學位不足、跨境學童問題係當局當務之急要處理，另外又有幼稚園教師薪酬制度、十五年免費教育等議題都係燙手山芋，所以佢去求神庇佑都唔奇，又或者食餐齋菜積福，期望蛇年順風順水。