政情：廢腑之言：李話估唔到超級咁忙
身兼行政會議成員嘅民建聯超級議員李慧琼（Starry），尋日出席一個酒會時談到農曆新年期間嘅工作量，佢大呻做超級議員最意想不到嘅係，無論喺時間、體力同資源上都係一個挑戰，估唔到工作量會咁大，仲質疑可能政府設計呢個選舉出嚟嗰時都評估唔到呢個問題。不過，Starry參選超級區議會時，都係去晒全港拉票o架啦，唔係預咗當選後會咁忙嘅咩？
據聞Starry當初參選超級議員時，諗住同黨友、現任政制及內地事務局副局長劉江華拍住上嘛，一個負責香港、九龍事務，一個負責新界事務，點知劉江華落選，所以Starry就要一腳踢走勻全港十八區囉。Starry話，佢喺農曆新年連續兩個星期日都要一日走八場團拜，就算平日都要每日走四、五場，簡直就係一個新挑戰喎。比起其他議員，佢都算係勤力嘅一個。
（鄧湄攝）