政情：專唱對台田少想點?
有旅行社嘅內地來港團住宿貨不對辦風波愈鬧愈大，對香港旅遊業打擊甚深，本來身為旅遊發展局主席嘅自由黨立法會議員田北俊（田少）應該幫手諗吓點補鑊，但有政界人士發現，田少非但對此冇乜好建議，反而繼續同特首梁振英（CY）唱對台，一時又以商界代言人身份，自言針對CY「冇料到」，尋日又唔認同CY話不會盲目爭取旅客人數嘅講法，究竟田少連番動作有何動機？
長津政策 批梁「一言堂」
CY當選特首後不下多次伸出橄欖枝，講到明香港以後無「唐營」、「梁營」，只有「香港營」，但有個別政界人士對CY呢個善意嘅訊息非但毫無反應，更甚者多次同政府，甚至係CY唱對台，講緊嘅係被視為「唐營」核心嘅田少，事關佢自CY上場七個多月以來，多次發言都同CY唱對台，最經典嘅金句係回應CY大宅僭建事件時，多次不留情面直斥CY係將特首個位「呃番嚟」。
到早前政府推出長者生活津貼政策，田少又話CY連民建聯同工聯會嘅意見都冇聽，認為這根本唔係合作，只係「一言堂」，話CY最終只會自食其果咁話。直到近日田少先後兩次睇準時機發炮，第一炮係接受個別傳媒訪問時，直指商界非針對CY推出政策，而係針對CY「冇料到」。
旅客增長 反擊梁睇法
至於田少嘅第二炮係以旅發局主席身份同CY隔空辯論對旅遊業發展嘅睇法。CY尋日出席行政會議前話，港府喺考慮旅遊業發展政策大方向時，不應只盲目爭取旅客人數增長，亦要不能影響香港市民正常生活。事隔只係唔夠幾個鐘，田少即刻出擊話，唔認同CY盲目追求旅客人數嘅講法，話擔心會令旅客誤以為香港唔歡迎佢哋來港旅遊喎，反應之快真係前所未有。
話時話，站在睇戲食花生嘅立場，田少接連同CY唱對台，唯恐天下不亂嘅好事之徒一定係好受落，但對於事件本身有幾多幫助，呢個大家真係心中有數，如果可以有更多有建設性嘅意見畀政府，相信呢個都係社會各界樂見嘅情況，否則就會被人揣測連番動作背後有乜動機囉！