中環出更：范鴻齡現身 同鄉里團拜
行政會議前成員兼中信泰富前董事總經理范鴻齡（Henry），自從○八年中信泰富炒燶外匯事件退下火線後，就好少喺公開場合露面。前晚浙江省同鄉會聯合會舉行團拜，身為浙江寧波人嘅Henry精神奕奕現身撐鄉親，佢笑容滿面，同鄉里好好傾，但問起近況佢就唔想多講喇。Henry曾經係「公職王」，叱咤一時，佢淡出政界後輪到妹妹羅范椒芬接力做行會成員，繼續服務社會。
陳仲尼話冇受滋擾
當晚浙江幫僑領傾巢而出，包括慈善家李和聲、製衣大王陳元鉅及聲寶－樂聲創辦人李達三等人，陳元鉅嘅公子兼考試及評核局主席陳仲尼（Rock）亦有到場。阿Rock最近成日受到部分教育界人士狙擊，事關佢以大熱姿態棄選港區全國人大代表後，轉頭又獲委任做全國政協委員，佢話並冇受到滋擾，希望大家明白兩個崗位係兩回事喎。浙江幫首次躋身全國政協嘅仲有浙聯會會長李德麟及常務理事王志良。
卓妮