中環出更：人大「雞精班」珠姐教封殺偷錄
近日新春特別多團拜酒會，準備上京開兩會嘅一班人大政協頻頻碰面，好似尋日香港島各界聯合會新春酒會，雲集過百名政商界名人，當中有唔少係人大同政協。作為人大新丁嘅工聯會理事長吳秋北就透露，有人特別為佢哋班新丁搞「雞精班」補習，等佢哋唔好出事兼亂講嘢，而重點係封殺錄音機偷錄談話。
吳秋北話，近排日日都見班港區人大新丁，而資深人大代表譚惠珠前晚就同廿幾位港區人大食飯，珠姐席間教路點樣寫提案，仲爆料話當年有人喺閉門會議發言，點知最後被記者寫晒出街，原來有人擺放錄音筆偷聽，所以叮囑大家記得發言時，要留意四周有冇錄音機，更加唔好幫手偷錄喎！
咁班新丁又有咩提案呢？同樣新當選人大嘅王庭聰就話，自己草擬緊監管內地食物安全嘅提案，因為佢話現時奶粉水貨客充斥，主因都係內地食品畀唔到信心，如果提高安全水準，水貨客自然冇晒咁話。另外，佢私底下又希望取消年初二賀歲煙花，希望減低空氣污染。
盧文端減少飯局身體好
除咗港區人大，連政協都有「雞精班」，全國政協委員盧文端就話，今個周六會邀請一班新政協委員上堂，教佢哋要點樣睇工作報告。
人大政協上京開會，好多時都係飲飲食食，事關飲宴好多，盧文端就透露今年減少咗好多飯局，唔使咁頻撲之下，身體都好啲喎。
卓妮