等呀等，等呀等，等呀等呀等呀等……特區旗幟高高掛之下討生活嘅香港人，回歸十六年以來睇怕已經練成一項武林絕技，無以名之，姑且稱之為「苦等神功」。
係呀，乜鬼都要等o架，申請上樓住公屋固然要等，百年歸老葬龕位同樣要等。去醫院睇急症仲要左等右等呢家嘢最荒謬，曾經有人等咗十粒鐘先至見到醫生，急驚風遇着慢郎中嘅結果係一命嗚呼，真係冤哉枉也。
粉嶺有一項工程，一等就等咗十四年，如果唔係練成苦等神功傍身，恐怕唔少街坊街里一早已經激鬼死。乜嘢工程咁巴閉要拖咁耐呢？咪就係粉嶺一鳴路早於十四年前已經規劃興建嘅休憩設施以及寵物公園囉！
北區地政處證實，有關土地喺九十年代曾被建議闢作公園用途，及後計劃被擱置，其後又接獲相關部門通知，於上址勘察以準備興建公園，但未能提供相關時間。康文署發言人就話嘞，有關計劃由該署及建築署負責，打算興建設施包括園景休憩處、有蓋太極園、兒童遊樂處、健身站、長者健身角、寵物公園同緩跑徑等等。建築署發言人話喎，目前有關項目嘅深化設計已經完成，康文署會按各項工程嘅優次作出跟進，務求早日落實項目。不過，對於工程延誤嘅原因以及施工時間等等問題，兩個部門都冇正面回應。
興建一個公園啫，又唔係打造高科技神舟飛船上太空，居然一等就等咗十四年，難怪粉嶺居民眼火爆。當地區議員姚銘自然批評官僚效率低啦，佢話有關計劃曾經出現於立法會文件，政府承諾過一○年中動工，一一年底落成啟用。喂，家陣係公元二○一三年嘞，姚銘形容為「連樓梯響都未響過」，街坊肯定大表不滿啦。
其中一位寵物主人王太問得好：「狗仔未出世已經聽講話會起寵物公園，唔通依家要等佢過埋身先起好？」唉，功夫茶不期然諗起一眾達官貴人嘅僭建風波，興建私人園林肯定唔使十四年咁耐囉。
呢嗱嗱嗱，雖然話香港人練成苦等神功啫，不過人類嘅忍耐力始終係有限o架，呢樣又要等，嗰樣又要等，萬一等到忍無可忍點算好呀？除咗粉嶺呢一個公園之外，香港其實仲有好多工程未完成，包括過氣特首曾蔭權當初拍晒心口保證嘅十大基建。不如咁講啦，當一個人失去耐性嘅時候，真係乜鬼都做得出o架，今時今日香港充滿怨氣，一大關鍵就係等來等去都等唔到政府兌現承諾。
現屆政府誓神劈願咁話民生無小事，如果唔係再一次表演「你呃人」，唔該認真兌現興建公園嘅承諾先啦！