適逢農曆新年，唔少政商名人都會離港度假抖一抖，廠商會會長施榮懷（Irons）就約埋其餘三兄弟同佢哋嘅屋企人，一行十九人去澳洲墨爾本享受七日南半球嘅新年假期，陣容頂盛。
Irons除咗陪姪仔、姪女去當地農場體驗剪羊毛、餵袋鼠同揸牛奶等外，仲好識歎咁同三兄弟去當地酒莊品酒，更一個人勁擦兩打生蠔，真係識食！
Irons喺網上大晒澳洲家庭樂嘅相，原來佢哋幾家人每年都會遊埠慶祝新年，繼上年去完澳門，今年就選址澳洲墨爾本。已經係第三次去澳洲賀年嘅Irons今次仲去咗菲臘島（Philip Island）睇企鵝同參觀十二門徒石添！雖然澳洲盛產紅酒，不過Irons就話紅酒並非佢嘅至愛，威士忌先係佢嘅杯中物，所以佢只係買咗少少白酒送畀朋友，未有好似三兄弟咁大舉掃貨。