前排有套觸及中港矛盾嘅電視劇激起網民熱烈討論，仲惹來唔少投訴，點知類似嘅事尋日又喺《城市論壇》發生。話說尋日有位自稱「大陸豬」嘅論壇常客喺台下發言環節，叫政府學下美國拓展多元產業，點知佢一自我介紹就觸發場外一片鬧爆，覺得「大陸豬」呢個名有影射內地人係豬之嫌，仲大罵佢係走狗，又叫佢即刻離場出去單挑。
原來「大陸豬」真係姓朱，嚟自大陸，確係「大陸朱」。呢位朱先生嚟到香港仲叫自己做「大陸朱」，有人或者會欣賞佢飲水思源，不過「大陸朱」嘅一眾維園「戰友」就唔係咁睇，覺得「大陸朱」呢個名擺明踩界，論壇完咗之後仲企定定喺門口恭候，夾道用指罵將佢送走。
