北京「兩會」今年好可能於三月十三日閉幕，前政務司司長唐英年極有機會於當日正式升任為政協常委。可惜鏡頭一轉返嚟香港，唐英年九龍塘約道大宅僭建一案將於同日提堂，唐太郭妤淺身為「業主代理人」屬被告之一，或要親自上庭應訊。
福禍同日臨，場面都幾尷尬，不過經民聯副主席、曾屬唐營嘅林健鋒就唔係咁睇，佢話「兩會」十點就閉幕，就算唐英年即刻起程回港，都要下午三點先到埗，相信兩件事唔會同一時間發生，亦唔會尷尬。尷唔尷尬當事人心中有數，不過唐唐有好友將件事講到咁唔尷尬，都應該飲得杯落喇。
