民主黨立法會議員單仲偕（(先刂)雞）雖然喺白鴿黨換屆後成為黨團召集人，但唔少重大事務仍然由主席劉慧卿發言，(先刂)雞就好似退居幕後咁隱晒形。尋日(先刂)雞舉行團拜，被問到覺唔覺得卿姐搶晒啲嘢嚟做，(先刂)雞就酸溜溜咁講咗一句：「佢鍾意講咪由得佢講囉，無人會同佢爭。」(先刂)雞話自己行為既唔夠其他人激進，講嘢又唔夠人哋大聲，所以繼續選擇行番溫和路線。
既然溫和，佢當然無點名講明邊個激進同大聲，不過都不言而喻啦。(先刂)雞之前同卿姐爭過黨主席寶座，最後畀唔嫁又嫁嘅卿姐以十六票之差擊敗，搞到佢惟有退而求其次出任黨團召集人。(先刂)雞尋日話，依家自己鍾意喺立法會開會期間接見地區團體，周不時發完言就要返上辦公室開會，所以大家就覺得佢唔多出聲。
煮嘢食靠把口
雖然(先刂)雞平時喺立法會唔多講嘢，但原來佢一講起下廚就會雞啄唔斷。佢話自己私底下好鍾意煮嘢食，不過並唔係捲起衫袖親自下廚，而係企喺老婆身邊用把口教佢點煮。佢話自己近來好鍾意睇YouTube學煮餸，中西式乜都整勻晒，嚟緊想學整麵包同西班牙菜。唔知佢係咪都係打算靠把口嚟煮呢？