政情：怪味嚇窒議員 立會健身室趕客
立法會大樓五樓除咗係一眾議員歎茶打躉嘅好去處外，原來仲係一個做運動嘅好地方。上屆喺唔使開會嘅時候，唔少議員好鍾意去健身室做運動，就好似白鴿黨李永達、公民黨陳淑莊等都係健身室嘅常客。不過今屆會期開始咗足足五個幾月，竟然冇聽過話有議員去做運動，唔通呢屆啲議員唔鍾意做運動，定係健身室突然變得「生人勿近」，嚇怕一眾議員？
陳恒鑌怕怕 唔敢跑步
民建聯陳恒鑌（Ben）解釋，議員們並唔係唔鍾意做運動，而係健身室周不時瀰漫住一股異味，搞到大家都唔鍾意入去。Ben話之前試過入健身室跑步，當佢一行入去，一陣奇怪嘅氣味即時撲面而來。佢做完運動後去健身室隔籬嘅浴室沖涼，但當佢沖完涼想用風筒吹頭時，竟然發現搵勻成個浴室都搵唔到插頭，佢惟有好無奈咁行出浴室，用跑步機隔籬嘅插頭吹頭。
經此一役，阿Ben話自己見過鬼都怕黑，寧願去其他會所做運動，都唔再上健身室跑步喎。佢建議秘書處平日開大啲冷氣辟走怪味，或者將跑步機搬去戶外，咁就唔使嘥咗啲地方喇。