政情：冇幫手入利是 劉國勳畀老婆詐型
民建聯北區區議員劉國勳同新界社團聯會理事呂迪明（Casta）結咗婚差唔多成年，今次農曆新年係第一年大派利是，心情難免緊張。
劉國勳話第一年封利是唔知預幾多錢好，於是準備咗一萬蚊封利是，實行人人有份永無落空。不過，劉國勳就呻話自己用晒啲錢嚟封利是，搞到過年都冇錢買新衫，淨係買咗對三百零蚊嘅運動鞋當係叫做應吓節。佢又講笑話希望財爺曾俊華喺月尾發表嘅財政預算案可以退番少少稅，等佢哋兩公婆可以幫補吓派咗出去嘅利是錢喎。
生仔大計左搖右擺
劉太Casta就投訴老公年尾淨係攞咗一萬蚊返屋企，叫佢自己去「唱散」啲錢封利是，之後就乜都唔理冇幫手入利是，淨得佢同奶奶兩個人入利是入足成晚。劉太新年期間去親戚屋企拜年，收到最多嘅祝福說話不外乎都係早生貴子嗰啲，但劉太就話至今都未有生仔大計。劉國勳開頭同老婆同一陣線，話生仔呢啲大工程都係順其自然比較好，但轉個頭又話生番個仔可以幫手逗利是，搞到劉太聽到都唔知好嬲定好笑。