中環出更：陳南祿：飛機安全過車
早前一架由泰國飛往香港嘅A380客機喺二萬多呎高空飛行途中，機門離奇「露罅」吋半，雖然最後安全着陸，但乘客已經嚇餐飽。曾任職航空公司高層嘅恒隆地產董事總經理陳南祿（Philip）因經常外遊及公幹，年中都搭唔少飛機。佢就話唔擔心飛機安全，事關綜觀飛機嘅失事率好低，航空交通遠比地面交通安全得多。
Philip分析，以飛機本身嘅設計嚟講，因機內外氣壓迥異，飛行途中機門肯定係唔會打得開嘅，所以理應安全。佢話，飛機同機師每年檢驗嘅次數頻密，汽車都未必會驗得咁密，而且汽車喺地面只可以轉左或者右，而飛機則可上下左右移動，所以無論點計，飛機嘅安全性都係較高。
偕妻兒首爾度歲
農曆新年期間，Philip同妻兒去咗韓國首爾旅行五天，深感當地變化日新月異，以前佢基本上講日文就可以溝通，依家多咗好多人講國語。佢仲話，韓國人都好重視農曆新年，所以佢哋去玩嗰幾日，好多舖頭都仲未開市，幸好佢哋今趟主要係以觀光同飲食為主，唔購物都一樣咁開心。