中環出更：與佛有緣子淇爸盼回饋社會
千億新抱徐子淇爸爸徐傳順，因為父憑女貴，做咗公眾人物，原來徐爸爸篤信佛學，近日仲做埋香港佛教聯合會嘅名譽顧問，希望回饋社會喎。
尋日佛聯新春團拜，徐爸爸低調現身，見佢誦佛號時雙手合十，唸唸有詞，好虔誠。原來佢拜佛逾廿年，師傅就係大名鼎鼎嘅永惺法師。徐爸爸話，自從信佛後，心境祥和咗，煩惱都少啲。佢又盛讚佛學博大精深，閒來唔止鍾意睇佛經，每逢初一、十五，都會茹素。咁蹺親家四叔李兆基都鍾意講佛偈，難怪兩家咁啱傾嘞。
新正頭，徐爸爸不忘同囡囡子淇及三名孫兒遊夏威夷，共享天倫，但子淇留喺美國玩多一陣。問徐爸爸封幾多利是畀孫兒，佢就賣關子話：「象徵式喇。」
許曉暉囡囡食素標高
民政事務局副局長許曉暉（Florence）都一身紅噹噹唐裝撐場，喜氣洋洋。Florence茹素廿年，初一全家食齋，兩個女兒年紀輕輕已愛上食素，水果不離口。因為食得健康，身材高人一等，Florence都嚇咗一跳，笑言食素原來可以增高。
年前曾因重病入院嘅寶蓮禪寺住持釋智慧都嚟主禮，見佢滿場飛同人打招呼，神采飛揚。講起少林寺將申請喺西貢建寺，釋大師就話唔關佢哋事，然後匆匆走人。出家人不問世事，果然講得出，做得到！
卓妮