元朗居民伍先生發現，西堤街公廁對出休憩處經常有人聚集賭博，高峰時人數會多達近二十人，在人流極多環境下仍肆無忌憚下注，期間更懷疑有專人把風，以防警方巡查，「佢哋圍埋一齊賭，附近仲好似有人睇水，有時行過望下佢哋，就即刻有人望番轉頭！」伍先生要求警方加強巡邏，打擊區內聚賭問題。
「有啲人賭上癮就會愈賭愈大，搞到影響埋家庭，警方應該加大力度打擊！」當區區議員蕭浪鳴指，上址聚賭問題存在已久，直指警方未能有效打擊，要求警方嚴加執法，以遏止賭風。
警方發言人則說，一向致力打擊該區街頭聚賭活動，並與社區保持緊密聯繫，宣傳反街頭賭博訊息。發言人續稱，去年警方接獲十一宗與上址一帶有關的街頭聚賭舉報，同時進行連串打擊行動，成功拘捕十六名人士。