開講有話，有咁耐風流，就有咁耐折墮。香港一向以國際都會自居，假假地都係發達地區，估唔到今時今日竟然淪落到叫市民瞓天橋底，都唔知究竟係折墮，定係可悲。
件事係咁嘅。鑑於房屋問題愈來愈嚴重，港府絞盡腦汁都搵唔到地建屋，有人就獻計嘞，建議喺天橋底興建臨時房屋，作為青年宿舍，仲話居住環境會好過「棺材房」添。佢哋條數係咁計嘅，全港共有一千二百幾條行車天橋及近七百條行人天橋，唔少橋底嘅土地有發展潛力，唔好好利用，實屬浪費。
冇錯，天橋底嘅土地確實有發展空間，可以作為社區中心，亦可以作為文化表演場地，只要規劃得好，用途唔少o架。之不過，喺天橋底興建房屋咯喎，咁又唔同講法喇，試問邊個肯去住呢？係人都知本港空氣污染有幾嚴重，尤其係天橋底，車來車往，噪音大不特止，污染物亦特別多，正如有人話齋，一日到黑吸埋啲廢氣及懸浮粒子，唔死都肺癆，點樣居住吖。再講喇，唔少天橋底早就成為流浪漢嘅居所，如果用來興建房屋，豈不是同流浪漢爭地盤！
難為運輸及房屋局局長張炳良仲話天橋底建屋嘅建議「想法創新」添。嗱，既然咁創新，不如佢自己試吓先喇，身先士卒吖嘛，如果佢瞓天橋底都冇問題，咪證明建議可行囉。
講起唔知好笑定好嬲，港府搵地建屋，寸土必爭，居然連天橋底都唔放過，簡直到咗飢不擇食嘅地步。老實講吖，就算天橋底真係用來建屋，相對於整體房屋短缺問題，都係杯水車薪嘅咋，根本止唔到咳，與其病急亂投醫，不如切切實實諗吓點樣對症下藥好過喇。
即係咁，要對症下藥，本來唔係冇辦法嘅，例如填海、發展新界、重建工廈等等，當局滿肚密圈，計劃多多。弊就弊在弱勢政府動輒得咎，寸步難行，填海及發展新界東北爭議多多，純粹係無米粥，家陣連比較簡單嘅工廈重建計劃亦阻力重重。呢，政府邀請市建局展開兩個工廈重建先導項目，其中堅尼地城祥興工業大廈首個重建項目受到業主反對，勢難取得八成以上業權而面臨觸礁。你話喇，首個工廈重建項目就要跪低，出師未捷身先死，港府仲有乜嘢辦法吖。
始終都係呢句，巧婦難為無米之炊。港府解唔開地從何來呢個死結，就冇可能解決房屋問題。「安得廣廈千萬間，大庇天下寒士俱歡顏」，當年杜甫嘅慨嘆，亦即係今日無殼蝸牛嘅慨嘆。唔通香港人真係折墮到要瞓天橋底？