前特首曾蔭權爵士下台後，七年禍港，「政績」就係贏得「貪盡省港澳、歎盡海陸空」的臭名。
貪曾下台後，醜聞依然不愁寂寞，爆完一樁又一樁，果真是比初二維港煙火更璀璨！呢，海事處經過一年調查，行動雖然蝸行牛步，終踢爆貪曾講大話！事緣佢坐富豪遊艇受查，上電台解畫，一直強調自己「邀請之前，我都堅持，雖然人哋話我好小家，話我婆婆媽媽，但都必定要佢（船東）收番市場支付嘅價格同行政交通費用，從來無想到任何利益……」
然而，若要人不知，除非己莫為。如今海事處調查結果證實船東冇收錢，貪曾分明「擘大眼講大話」！貪曾話「從來無想到任何利益」，筆者忽然想到看過的一則笑話，不妨與讀者分享：
一個人花了一百萬，買了一幅名家字畫送給某領導，領導見了說：「假的吧？」這人說：「怎麼能是假的呢？」領導說：「這種畫啊，市場上一百塊一幅。」送畫的人急了，領導人接着說：「這畫雖是假的，但我還挺喜歡。這樣吧，我也不能白要，給你一百元，算我買你的！」後來，送畫之人求的事辦成了，領導亦坦然地笑說：「我從不受賄！」
貪曾案愈查愈大鑊，版本雖不同，收錢還是沒有收錢看來已無關宏旨，若然稍有分析能力的人，會相信「貪盡省港澳」的貪曾從不受賄，那就要快啲去驗吓個腦，看看有沒有腦殘了！
點講都好，貪曾台戲，如何做得好好睇睇，真係要睇廉署是否「不理任何身份、階層，貪污腐化冇得留低」！「香港，一直勝在有你和ＩＣＡＣ！」老朽樂觀最新的廉署宣傳片係真有料到。千祈唔好又呃人！一個壞蛋足以令「廉潔奉公」嘅香港蒙污，能不慎之？