前商務及經濟發展局局長馬時亨（肥亨）○八年因發現患上腦血管畸形症而請辭，佢早前接受一個電視節目訪問時，就大爆父親喺佢十幾歲嘅時候就因病過身，令佢引以為鑑，飲食上格外小心。
肥亨更笑言，自己好怕死，「當時唔能夠向同事透露自己有呢個病（腦血管畸形症），所以開完會會即刻量血壓，一見到血壓飆升就好驚，因為好易爆血管，導致腦中風。」
肥亨憶述，爸爸當年暴飲暴食，以致身形肥胖，未夠六十歲就因糖尿病仙遊。前車可鑑加上醫生嘅叮囑，令佢的起心肝改變飲食及生活習慣。佢話，以前飲食好冇節制，午晚餐都會食甜品，又鍾意食大閘蟹，但依家就規定每個周日先可以食一次甜品，大閘蟹都只係當造時食一次，閒時會行山、打高爾夫球同行步行機，雙管齊下輕咗二十磅。
細時愛踢波多過讀書嘅肥亨話，多得媽媽曾經同佢講「唔讀書大個要做乞兒」，令佢開竅兼成績大躍進，又感謝舅父資助佢讀大學，所以佢已視舅父如親父一樣。