政情：潘佩璆叫港台道歉
香港電台上周四晚播出嘅電視節目《議事論事》火藥味濃，獲邀出席嘅立法會議員「長毛」梁國雄，當場質問有「潮州辣妹」之稱嘅愛護香港力量發言人陳淨心係咪建制派，結果惹來陳淨心爆出一句「我係咪建制派關你叉事？」不過，港台就煞有介事將個「叉」字以「嘟」一聲蓋過，令外界誤會陳淨心爆粗。事件擾攘至今，連前立法會議員潘佩璆都睇唔過眼，認為港台好應該向陳淨心道歉。
消音惹誤會
潘佩璆喺社交網站留言，強調事實非常清楚，潮州辣妹喺節目中只講過「關你叉事」。佢話呢個「叉」字既非不雅，又唔係粗口諧音，況且香港一般年輕人都好常用呢四個字，相信搵粵音專家何文匯博士都唔會評為粗言穢語喎。佢仲形容，陳淨心係一位「年輕女士」，港台咁做法確實會損害當事人聲譽，應該鄭重道歉。其實潘佩璆近期都參加過愛港組織發起嘅活動，估唔到今次仲出聲護花，睇嚟佢冇做議員後已搵到個新嘅政治平台發聲喇。