政情：義投CSD HK 保懲署面子
本報日前報道運輸署昨日舉行嘅自訂車牌拍賣中，車牌「CSD HK」因非常近似懲教署英文縮寫而引起該署人員不滿，要求停止拍賣該車牌，甚至揚言到拍賣會場示威。不過，引起風波嘅車牌最終獲一位仁兄仗義相助，低調以五千元成功投得，並考慮轉贈懲教署體育會，事件最終大團圓結局。究竟係邊位大俠慷慨仗義貼錢投牌？原來係身兼新民黨副主席嘅仁濟醫院主席鄭承隆（Edwin）。
Edwin透露，雖然佢同懲教署署長單日堅好老友，但投車牌前並冇溝通過，佢都係睇完本報有關報道才得悉事件，由於佢本身係懲教署社區參與助更生委員會委員，同懲教署稱得上有淵源，於是就決定以個人名義為懲教署「投其所好」喇。目前佢未決定點樣處理個車牌，會同懲教署體育會商討點做，並希望喺一年後牌照期屆滿時唔再續牌，將車牌交還政府。
五千元成交「估唔到咁抵」
新民黨向來同紀律部隊關係友好，今次Edwin對件事咁上心係咪想借投牌討好懲教署，為日後參選立法會鋪路呢？Edwin就耍手否認，強調只係擔心「CSD HK」車牌一旦流入市面，有乜事發生就會影響懲教署形象，所以先至拔刀相助投車牌，更笑言估唔到車牌以底價五千元成交咁抵喎！
葉劉稱事先不知Edwin行動
不過，如果日後唔好彩再遇到有車牌同其他紀律部隊撞名，Edwin又會唔會做幕後金主投晒啲車牌呢？Edwin就希望運輸署遵守自訂車牌審批準則，唔好再批出令人聯想起政府部門嘅車牌，佢亦唔使晨早流流去投牌咁頻撲喇！新民黨主席葉劉淑儀得悉Edwin投得車牌，亦好欣賞對方行為，但就堅稱自己事前唔知情，亦強調該黨冇咁多閒錢去投車牌冧啲紀律部隊。
講番尋日自訂車牌拍賣，全日最高成交價為「AE」車牌，以二十萬元成交。而第二高成交價為「GZ」車牌，以十九萬五千元成交，投得者形容車牌成交價「好抵」，仲話會將車牌送給小朋友，豪言幾個仔女各有一個車牌。