中環出更：發叔自爆誤會 下籤當上籤

點解發叔對九十五籤咁有印象呢？莫非佢有預感知會求得九十五籤？抑或佢以前求過呢支籤，或有人點佢話係上籤呢？不過，九十六支車公靈籤入面，只有十七支係下籤，咁都被發叔求到，又難怪有人質疑發叔係咪使出求籤秘技整蠱特首梁振英。發叔就誓神劈願話求籤冇做假，佢一如以往，喺求籤當日早上七點起床，沐浴更衣，再出發去車公廟，肯定係有誠心祈禱去求籤喎。

雖然求得下籤，但發叔喺致辭時，講到今年係水蛇年，而蛇又有小龍之稱，對比往年嘅亢龍，小水龍可視為調整變更嘅徵象。佢話面對過去一年嘅政治爭拗，政府同市民都覺得煩厭，所以如果大家調整心態，以「皆大歡喜」之心取代鬥爭及黨同伐異勢不兩立之心，局面便會變得和諧清明……一定會趨吉避凶、轉危為機喎。簡單一條水蛇都畀佢發揮到咁和諧，後輩們真係要學吓嘢喇。

余漢坤（右）與太太劉玉蓮及囝囝一齊出席團拜。（徐家浩攝）

余國春（右）有兒子余偉傑（左）到公司幫手，如虎添翼。

余國春有生力軍幫手

卓妮同場仲見到發叔愛女劉玉蓮同女婿余漢坤一家、立法會議員蔣麗芸及丈夫梁海明，又見到裕華國貨董事總經理余國春同余偉傑（Andrew）兩父子。原來Andrew喺英國讀完經濟系畢業回港幾個月，依家喺家族公司幫手，據講係專責特別項目，成為公司嘅生力軍。

卓妮