經歷疫症居民更團結

葉興國是多年淘大花園居民，對○三年沙士爆發，感受至深，「三月廿六號，收到政府電話，話淘大有六個人懷疑染咗沙士入院。之後嗰幾日，入院人數幾何級上升！」為了專心打硬仗，他請兩星期大假與一眾淘大居民共同進退，「當日無人敢嚟淘大做清潔，我就同幾個熱心居民頂硬上，自己做埋清潔！」

「明白好多嘢唔係必然」

不經不覺已十年，回首當日夢魘，葉興國感觸良多，「身邊嘅朋友、鄰居，早幾日仲同你飲茶去旅行，突然之間就走咗。自此之後，學識珍惜身邊人，明白好多嘢唔係必然。」或許值得慶幸的，是共患難後，居民變得更團結，更懂得關心對方。

任職汽車維修的黃先生，○二年以一百二十萬元購入淘大花園E座單位。疫症發生，殺他一個措手不及，「樓價係咁跌唔在講，最驚係染病。政府未話封樓，我已經同家人去咗朋友屋企暫住，直至政府公布解封，先敢返去。」

現已退休的淘大花園E座居民陳先生，永遠記得○三年三月三十一日。當日清晨，政府封鎖E座。豈料一日後，又把居民送往度假村隔離。陳先生與家人被送往鯉魚門度假村，「當時真係好驚，大家一個接一個咁上車，個感覺係，入咗去都唔知幾時出得返嚟。」

難忘隔離時人情冷暖

十天的隔離日子，陳先生最難忘是度假村內破舊設施及工作人員的人情冷暖，「我哋只可以留喺間房度，第一日仲有人擺個飯喺門口，再嗌我哋食飯。到第二日，就咁擺喺地下算，我哋好似怪物咁畀人看待……」

「當時每朝都要探熱，一有燒就要畀人帶走。我哋每朝係咁飲水，確保無燒。因為大家都知道，畀人帶走，無論有冇感染沙士，都只有死路一條。」這段經歷，令到陳先生在十年後仍保留沙士時的生活習慣，「依家洗衫都會落消毒藥水，仲用一比九十九漂白水洗地，有備無患嘛！」沙士去了，但忘不了。