【本報訊】「無人諗過首長級官員要走入疫區，我爛命一條，有咩好怕！」面對沙士疫症，嬌滴滴的「媽打」李麗娟毫不畏懼親身帶領四十名年輕下屬，參與封鎖淘大花園，更成功說服以家中獨子為由不敢闖疫區的下屬。她說︰「當年大家係義不容辭，好團結！」
媽打憶述，○三年三月卅日晚上六時多，剛逛完街後回家，即收到時任「大內總管」前任特首辦主任林煥光的電話，「淘大花園有沙士帶菌者，希望在數小時內搵四十多名同事幫手，配合警方進行封鎖大廈」。最後成功召集四十名來自九龍城、黃大仙及觀塘民政事務署的社區聯絡主任。
因疫症爆發而封鎖住宅大廈是史無前例，多個部門「漏夜」開會準備。最令媽打印象深刻是︰「卅一日凌晨三時卅分開會講解行動，有個肥肥地男仔舉手話係家中獨子，有咩事，父母無人照顧，問我可唔可以唔去，我話冇問題。我心諗自己離咗婚，子女又大個，爛命一條，我代你去。講完晒，肥仔又舉手話，我決定參加。當下好感動，大家為咗一件事係義不容辭。」他們之後出發到牛頭角警署停車場，穿上整套包括眼罩、口罩及頭套等保護裝備，才乘警車出發到淘大花園。
十年過去，當年勇字行頭的媽打笑說︰「初時入疫區唔驚自己有事，反而擔心同事中招，每個都係咁年輕，有咩事點算呀？當時擔心咗十日，算是危情十日。」