政情:食衞局「雙陳」申報利益慢

新政府分批公布副局長同政治助理名單,佢哋絕對有責任盡快提交利益申報供公眾查閱,但食物及衞生局局長高永文嘅「左右手」副局長陳肇始(Sophia)同政治助理陳凱欣,上任至今至少有兩、三個月,佢哋相關嘅利益申報延至本周初都仲未上載至互聯網,直到尋日有其他政治助理被披露資產利益申報內容後,佢哋先至急急「補鑊」,認真係拖得就拖。

上任兩三個月都未提交

睇番食衞局網頁上有關「雙陳」嘅利益申報,其實Sophia嘅申報內容唔多,主要係申報喺英國倫敦有住宅物業同廿三個機構或團體銜頭,之不過Sophia簽名作實嘅時間,竟然係上周四。至於陳凱欣嘅情況亦唔好得幾多,佢嘅利益申報都係本月一日先簽名作實,佢除咗申報已婚外,唯一申報嘅係擁有九龍東某物業單位。究竟「雙陳」嘅利益申報點解咁遲先可以曝光,睇嚟佢哋真係要親自解吓畫。

話時話,政治人物最緊要係坦白,透明度愈高,被人非議責難嘅機會就愈細,希望「雙陳」經一事長一智,否則只會愈幫愈忙,要民望高企嘅高永文掉番轉頭為佢哋補鑊就唔好喇!

第一手消息請下載on.cc東方互動iPhone/iPad/Android/Windows Phone Apps