政情：沈祖堯獻禮 送朱元璋御用瓷杯

中大盼籌款一億元

中大又藉住春茗大談發展大計，好似沈祖堯除咗表演「靈蛇」功夫外，亦順便介紹中大五十周年校慶嘅慶祝活動，包括月底破紀錄有一千八百個中大師生同校友一齊參加渣打馬拉松賽事。而下月中沙士十周年，中大醫學院亦會搞一個國際研討會，邀請當年有份抗疫嘅國際專家到中大，商討日後點加強對抗沙士疫情。

今學年係大學首次改四年制，沈祖堯話中大因為起新樓，電費足足多咗一成，中大已定下減排大計，目標係喺二○二五年減排百分之廿五。中大亦會興建九條校友徑，將所有動物、植物加插標誌，校友可捐錢命名，希望籌到一億元。