政情：鬧醒鬍鬚曾 預算案減宣傳
財政司司長曾俊華（鬍鬚曾）成日將「應使則使」嘅理財原則掛喺口邊，但近年佢都花費唔少公帑做財政預算案嘅民意諮詢工作，即時被人寸佢嘥錢兼冇乜用，連續被人鬧咗多年，鬍鬚曾今年終於學精咗，返璞歸真冇再搞咁多花臣，好似近年例牌嘅宣傳片同漫畫書都冇晒影，粗略估計至少慳咗近八十萬元。與其搞咁多嘥錢嘅無謂嘢，倒不如實際考慮係咪「派糖」回應市民訴求好過！
曾扮「攝青鬼」聽意見
鬍鬚曾近年做預算案諮詢前夕，例必會搞幾次「大龍鳳」先心安，頭炮指定動作係宣傳片，最深刻印象嗰幾次包括佢喺一○至一一年度嘅宣傳片中扮「攝青鬼」聽意見，一一至一二年就拿自己嘅面相特徵開玩笑，呼籲市民「留意見唔使留鬚嘅」，事後當然狂畀人惡搞啦。而去年預算案宣傳仲搵埋歌星林子祥大唱數字歌，但就被批評搬出一大堆數字，天花亂墜，令預算案失去重點。
除咗宣傳片外，鬍鬚曾近年第二個指定動作係製作漫畫書呼籲市民畀意見，仲食過翻尋味一連做咗三年。還記得有立法會議員○九年時睇唔過眼，問吓鬍鬚曾呢一系列嘅宣傳用咗幾多錢，發現當年製作漫畫書用咗三十三萬元，製成電視短片同播放廣告就用咗四十萬元，再加埋其他開支，淨係製作同廣告費都用咗七十四萬元，呢條數年年累積嘅話認真襟計。
冇同建制摸底收風
唔知鬍鬚曾係咪見宣傳嘥錢又冇乜成效，今年預算案嘅宣傳工作應慳則慳，至少用兩招去自行節流，首先係同施政報告用同一個網頁宣傳，其次係冇再堅持搵人畫漫畫，亦冇特別拍多輯宣傳片，只係維持喺預算案公布前推出短片提醒大家邊度有得攞預算案資料，實行慳番一筆。
此外，鬍鬚曾連見政黨諮詢意見都有意慳番，事關今年施政報告同預算案合併諮詢，所以佢冇打算喺預算案臨公布前再同建制派坐低摸底，但願鬍鬚曾對市民嘅訴求把脈得準，否則到時紓困措施唔到位又惹來民憤，就唔好怨人喇！