中環出更：紀文鳳自爆「恐共」
中港兩地矛盾持續，商界女強人紀文鳳（Leonie）就透露自己其實都「恐共」。話說由Leonie擔任義務秘書嘅無止橋慈善基金尋日出版新書，Leonie就喺序言中話自己係土生土長嘅香港人，亦係「恐共」分子，但為咗探個究竟，就親身殺入內地開公司，先至發覺內地發展迅速，內地人愈來愈叻，反觀香港就只係識得「食老本」。佢仲叫香港嘅後生仔應該多啲返內地了解一下咁話。
無止橋慈善基金成立咗五年，Leonie就策劃出版新書《二十四橋明月夜》，記載基金過去五年來喺內地貧困山區興建廿四條便橋嘅故事。曾參與建便橋嘅有政務司司長林鄭月娥同林節思兩母子、環境局局長黃錦星、醫院管理局新界東醫院聯網總監馮康愛女馮海容等。新書出版咗四千本，Leonie仲話計劃喺內地出版，卓妮就八卦下出書使咗幾多錢啦，佢就神神秘秘話本書用嘅紙係人哋贊助嘅環保紙，唔係好貴喎。