中環出更：戴尚安煉油自駕遊
民政事務局前常秘李麗娟姨甥戴尚安（Sean）係新一代環保先鋒，繼年前征服非洲最高峰，喚起各界關注地球暖化後，月前再以自駕遊方式遊遍東南亞，邊走邊收集「萬年油」用作提煉汽車油渣，成功遊遍多國。佢之所以攞苦嚟辛，目的都係想喚醒地球人「油盡其用」啫。
三十三歲嘅阿Sean，去年十月與六名攝製隊人員由新加坡開車出發，經馬來西亞、泰國曼谷等地，再到目的地柬埔寨。期間山路崎嶇，又要穿越熱帶雨林、住樹屋，旅程歷時一個月，日日有驚喜。更刺激係，阿Sean駕駛嘅越野車，燃料要「自給自足」，唔准去油站入油，所以佢沿途要向餐廳、食肆募集「萬年油」。
佢逐家逐戶拍門，吃盡閉門羹，被唔少餐廳老闆喝罵，有些則趁機要錢，索價約一百六十港元出售二十公升「萬年油」。雖然燃油難求，但阿Sean冇氣餒，最後行到鞋都爛，搵到逾百間餐廳「索油」。咪睇小黑如墨汁兼帶攻鼻油饐味嘅「萬年油」，經過一部小機器加工提煉，約兩小時便轉化成油渣，足以推動越野車。
戒食豬肉同炸嘢
每十公升「萬年油」，可製成八公升油渣，阿Sean每三日就要製油一次，唔經唔覺行咗二千五百公里路，確係平靚正。期間阿Sean又參觀喺馬拉嘅養豬場，親手剷豬糞，用來製成汽油發電。提起臭氣逼人嘅豬場，佢皺晒眉頭話：「啲豬被困喺惡劣環境下飼養，我睇完冇晒胃口，發誓唔再食豬肉，亦戒食炸嘢，因為萬年油太恐怖！」回到香港後，Sean繼續做「綠色人」，除崇尚素食，亦拒絕買車，並將於四月舉辦「索油之旅」攝影展，喚醒港人製油改變世界！
卓妮