內地客興高采烈來港旅遊歡度新春，居然冇得入住酒店房間，連純粹過夜嘅時鐘酒店甚至設備簡陋嘅度假營都冇，團友被迫瞓旅遊巴甚至跳海，而且連爆兩單，香港仲話係旅遊天堂？唉，簡直就係賣豬仔啦！
件事係咁嘅，其中一個港澳遊旅行團喎，合共三十四人，團費介乎一千幾至二千幾元人民幣。原本行程係首三日喺香港遊覽海洋公園以及迪士尼樂園等等景點，最後兩日轉去澳門，香港行程由世通假期負責接待。點不知，來港第一日就出事。
旅行團過關之時已經諸多阻滯，過關之後導遊帶佢哋去海洋公園玩，逗留兩個多鐘頭就匆匆離開，轉到九龍城碼頭準備乘搭觀光船欣賞維港夜景。團友去到碼頭之後，導遊竟然話訂唔到船票喎，改為帶團友去新蒲崗食飯同參觀星光大道。跟住去到夜晚十點，團友乘坐旅遊巴到達深水埗黃竹街，匪夷所思嘅奇怪事情又發生，旅行社居然又話賓館爆棚，無法安排住宿。喂，換轉係任何一個正常地球人都會火滾啦，所以團友嬲到報警求助。
導遊左騰右騰兜兜轉轉，將團友耍來耍去，結果旅遊巴折返黃竹街近楓樹街遊樂場路邊停泊，團友被迫喺旅遊巴瞓覺過夜呀，冇陰功。雖然第二晚終於獲安排入住酒店，點知朝早瞓醒覺居然發現導遊已經潛水返內地，旅行團被迫解散，留低班團友吊吊揈。
因乜事幹類似嘅旅遊醜聞會喺香港不斷發生嘅呢？旅遊業議會話喎，負責接待嘅世通假期冇事先訂房係嚴重違規，不能接受，已經要求旅行社七日內提交報告，不排除吊銷牌照。
有資深旅遊業界人士指出，罪魁禍首係內地旅行社入侵香港旅遊業，專以低廉價格組織內地「散拼團」，臨急臨忙先至組團出發，根本冇時間訂房，遇上旺季就連博大霧嘅機會都冇。所以資深人士就話嘞，最好規定訪港團必須由香港旅行社訂房，唔可以由內地組團社代訂。
其實講到尾，始終都係監管出咗問題。喂，若然明文規定旅行社一定要訂好酒店房間先至准許成團出發，賣豬仔嘅情況點可能出現呀？即使你今日吊銷世通假期嘅牌照，難保日後唔會有另一隻業界壞蛋害到香港蒙羞喎。
醜死鬼啊醜死鬼，一時有個惡導遊阿珍強迫購物，一時又有個豬仔團將內地客丟棄於旅遊巴，香港幾時先至可以做番一個名副其實嘅旅遊天堂呀？生性啦，官老爺，欠缺監管係嚴重失職，激到北大人嬲嬲地可能吊銷問責高官嘅牌照o架！