保衞香港自由聯盟早前發起「不合作運動」，頭炮呼籲市民喺第二期繳稅時少交十蚊稅，佢哋諮詢過律師同稅務專家嘅意見，評估少交十蚊稅唔需要付出好大代價，如果多人參與嘅話，可迫使稅務局用民事起訴追收欠稅，分分鐘癱瘓政府程序都未定。不過，運動即將展開之際，忽然冇晒聲氣，而政府更加擺出一副等睇戲嘅姿態，好似未驚過咁款，完全唔當呢項運動係咩一回事。
有官場中人話，香港人一向守法，對市民係咪會接受用呢個方式抗議有所保留，加上交稅金額對好多人嚟講屬個人私隱，就算到時真係少交十蚊稅，相信都唔想畀人知道自己參與有關運動。事實上，聯盟成員似乎亦開始意識到呢個問題，覺得即使行動後叫稅務局交出欠稅人數，有關數字亦未必代表全部都係參與少交十蚊稅運動嘅人士，而稅務局亦未必咁好人交出只係少交十蚊稅嘅人數。
據聞聯盟成員現正頭痛點樣可以有效統計參加行動嘅人數，初步計劃會喺三、四月第二期繳稅前再搞集會造勢。不過，目前最迫在眉睫嘅都係重新搞起活動，所以佢哋最快喺聽日初七「人日」再出動，重返街頭呼籲市民響應行動。