政情：鄧家彪形容 區議員似收數
立法會勞工界議員鄧家彪（Bill）本身係離島區議員，又升呢做咗立法會議員，佢話區議會同立法會工作性質大同小異，但兩者做個案嘅態度就有好大分別嘞，前者可以好似收數佬咁用啲較為「爛仔」嘅招數完成地區個案。阿Bill透露，以前做區議員時，試過幫居民寫信去財務公司問點解要還咁多錢，又試過幫地盤工人追收欠薪血汗錢，但依家做咗立法會議員就要注意身份。
喺立法會忙到天昏地暗嘅阿Bill，趁住放農曆新年假冇乜嘢做，就同老婆帶埋三歲嘅囡囡鄧澄去東涌行山行大運。
愛女個名有型
阿Bill話，幫囡囡改單字名純粹因為有型，話去除部首就係疊字「登登」，仲話如果遲啲發現五行唔啱會再改過喎。雖然行去大澳段山路都幾斜幾難行，但行足兩粒鐘嘅澄澄都冇扭計要人抱，仲非常精靈咁扮鬼臉氹爸爸笑。阿Bill每晚返屋企見到呢個開心果，相信幾辛苦都會唔記得晒喇。