政情：愛港力陳淨心 斥港台搞港獨
香港電台上周錄影《議事論事》，當時有組織喺錄影廠外爆發衝突，但估唔到連錄影廠入面都火花四濺。為咗響應議題「議會內外分化」，港台喺錄影廠內分別放置咗中國國旗、特區區旗，以及港英旗，有「潮州辣妹」之稱嘅愛護香港力量發言人陳淨心就面燶燶質問港台係咪支持港獨，又鬧爆監製插支旗出嚟想誤導市民，令市民誤以為港獨議題有討論空間，節目主持即時澄清港台豎立嘅係殖民地時代嘅港英旗，而唔係港獨旗。
疑向長毛爆粗
社民連梁國雄（長毛）喺呢個時候加入戰團，話可惜香港冇中宣部，但係佢未講完，陳淨心已經發晒茅話長毛嘅言論踐踏中國人嘅尊嚴，問長毛「會唔會搵人去CNN講加州獨立」，跟手仲索性指住長毛話「簡直唔係人」。
幾分鐘之後，陳淨心話佢自己去參加撐梁遊行，係因為睇唔過眼有啲議員成日掟嘢，為反而反，阻住政府做嘢。
不過，長毛反寸陳淨心「係政權嘅一條狗」，又問對方係咪建制派，逼到陳淨心疑似爆粗回敬：「我係咪建制關你×事？」當時兩個主持你眼望我眼，唔知講咩好，惟有轉問蔣麗芸（Ann）會唔會參加撐梁遊行。