政情：楊釗勤練「十八法」肩頸痛症好轉
練功保健成為時尚，中華總商會會長「牛仔褲大王」楊釗，最近都愛上「練功十八法」，仲邀請咗內地嘅莊建申師傅來港大力推廣，喺佢公司、商會及多個會所開班授徒。
據聞呢套「練功十八法」專治頸肩、腰腿及關節痛等常見嘅都市病，莊學山、余國春、藍鴻震夫婦等政商界名人都爭住學埋一份，仲耍得有板有眼添！
鼓勵友好一齊學
楊釗話，自己多年來經常耷低頭睇文件同簽支票，久而久之形成肩頸痛，更曾經患上俗稱「五十肩」嘅肩周炎。後來佢接觸到呢套功夫，痛症情況大為改善，最近又重新練習咗一個月，覺得效果好顯著，所以佢近期積極鼓勵身邊友好一齊學。
楊釗仲話，痛症已經唔單止年長一輩患上，現今年輕一代同白領人士長時間用電腦，久坐寫字樓、坐姿不良加上缺乏運動，令到肩頸痛日趨年輕化。所以保健係每日不可缺少嘅環節，應該與三餐及睡眠睇齊，呼籲大家喺賺錢之餘，更要注重身體健康，提早保健，防患未然。