政情：嫻姐房策 天橋底住人

北京紐約都有發展先例

嫻姐尋日相約傳媒喺天橋底見面，宣布同中大建築學院副教授鄭炳鴻同文化人胡恩威成立民間組織「天橋底行動」，專門研究天橋底發展，頭炮係建議政府將觀塘繞道一段天橋底列作試點，用作舉辦文化活動，仲可以開吓演唱會添！佢哋話，其實香港對發展天橋底嘅概念相當落後，事實上世界各地，好似北京、紐約等地都有發展天橋底嘅先例，佢哋仲即席大爆冷知識，原來全港有一千二百條行車天橋，近七百條行人天橋，可見天橋底發展可謂潛力無限。

指北角屋苑更嘈十萬倍

不過，講到最爆嘅都係佢哋為「瞓天橋底」正名，建議政府喺天橋底放置貨櫃，作臨時房屋或者青年旅舍之用。嫻姐一邊望住觀塘繞道對開嘅一片海濱，一邊讚嘆其實環境都唔係好差，至少環境夠通風，比住劏房同「棺材房」好吖！嫻姐又話，雖然天橋底係嘈啲，但對面岸東區走廊海傍都有人住，仲爆出一句：「如果你住過城市花園就會知道，嘈過佢（天橋底）十萬倍！」

相信唔少基層打工仔聽到嫻姐嘅豪言壯語，都會忍唔住肅然起敬，事關嫻姐幫佢哋搵蝸居喎。不過，好多打工仔女都未住過城市花園，根本唔知有幾嘈，況且有錢人見嘈，大可以開冷氣閂窗隔音啫，如果嫻姐講到天橋底環境咁好，連吸汽車廢氣都冇所謂嘅話，唔知佢有冇諗過身先士卒搬去天橋底試吓住呢？至於基層市民瞓天橋底又可以點樣發憤圖強、逆境生存呢？可能要靠「天橋底行動」下次出動時開班授徒喇！