中環出更：妻驚青護兒 梁錦松淡定
農曆新年假期流流長，唔少名人選擇外遊度新歲。卓妮尋日就見到國際小母牛香港分會主席梁錦松一家現身機場，見佢笑容滿面，心情靚爆，原來係剛剛去完新加坡度假叉電。獅城近年成為唔少港人嘅旅遊熱點，聖淘沙、環球片場等景點，一家大細都啱玩，唔知佢哋有冇去勻晒呢？
明霞一拖三行先
尋日下午近一點鐘，阿松同太太伏明霞、大女司渝、大仔皓嘉及細仔家瑋，一家五口經由普通嘅乘客通道出境，行蹤好低調。戴住墨鏡嘅梁太一拖三，拖住寶貝仔女先行步出閘門，阿松就拉住行李尾隨老婆仔女，施施然咁行。
當走在前面嘅梁太發現卓妮時，隨即下意識想保護啲仔女，擰轉身之餘，仲用手遮實仔女塊面，司渝本來想向前行，結果畀媽咪掹住走，差啲企唔穩，惟有攬實媽咪。見慣大場面嘅阿松就定過抬油，梁太見到老公咁淡定，即時成身放鬆晒，繼而大方咁慢慢行，任影唔嬲。
卓妮