中環出更：囡囡陪跑馮康fit爆
馬拉松及長跑賽事嚟緊將接連舉行，參加者近日頻頻練跑備戰。大前日初三，卓妮就喺半山寶雲徑遇到醫院管理局新界東聯網總監馮康醫生，同囡囡馮海容（Elizabeth）結伴跑步，原來佢哋為嚟緊周日醫管局舉辦嘅新春長跑秘密練兵。世紀沙士疫症發生至今眨眼間已經十年，當年曾感染沙士病症嘅馮康就感慨話，患病時好需要家人嘅支持，有助病人積極面對逆境。
當日卓妮見馮康健步如飛，同囡囡話咁快就跑完四公里路程，佢哋話平時最少練跑八公里，但由於臨近比賽，所以要留力。馮康憶述，當年感染沙士病症初愈後出院翌日，已經急不及待到寶雲徑練跑鍛煉體格，可惜跑三公里就已經氣促，幸得家人支持，而囡囡亦經常陪佢跑步鍛煉，最終○四年成功完成全馬路程，復原進度咁好，佢都感到高興。
身邊嘅囡囡Elizabeth大讚爸爸精力十足，笑言由細到大，只有爸爸出院後復跑嗰次，先至有機會跑得快過爸爸喎！馮康鼓勵大家，當遇到疾病、失意時，謹記要同至親保持溝通，因為親人嘅支持好重要。
丁志威孖老友備戰
咁啱早幾日，卓妮亦喺黃大仙一間中學嘅運動場，見到黃大仙區議員丁志威（Roy），拍住十大傑青呂宇俊、鄭家豪、區議員莫仲輝等老友一齊練跑，備戰月底嘅渣打馬拉松賽事。阿Roy話，今次會同老友組隊參加馬拉松十公里賽事，目的係幫十間慈善機構籌款。為咗保持最佳狀態，佢連飲食都刻意少油少鹽，戒食至愛雞蛋仔，只食白烚雞肉同乳酪，兩個月搣甩九磅肉，真係少啲意志都唔得。
卓妮