嘩，小姐你印堂發黑，雙眼無神，嘴唇發白，如無意外踎低起身見頭暈，好可能係鬼上身喎。咁啦，將你成副身家畀晒我，最低限度十萬九千七，我幫你起壇作法祈福驅魔啦！
呢一種咁老套嘅祈福黨呃人伎倆，相信大家耳熟能詳，就算仍然有文盲大嬸傻更更上當，對於大部分精明嘅香港人嚟講已經毫無說服力。之不過咁，有一樣嘢大家必須留意，騙財老千其實萬變不離其宗，歸根究柢一字記之曰：嚇。一味靠嚇無往而不利，隨時其貌不揚嘅茅山師傅都可以呃到冰清玉潔嘅無知少女上床轉運。
嗱，假設你唔係祈福黨員，又唔係茅山師傅，而係健身中心職員，你可以點樣靠嚇嚟賺多兩個錢呢？你可以話，小姐呀小姐，你體質好鬼死虛弱喎，條脷竟然掂唔到鼻哥，雙耳又唔能夠活動自如，不如報名加入會籍健身五年啦，會費只不過四萬幾之嘛。你又可以話，咁都未夠o架，睇你膊頭掂唔到腳趾尾，筋骨肯定好僵硬嘞，不如上堂學習泰拳啦，學費只不過二萬六千幾之嘛。
千祈唔好以為功夫茶老作，全部有事實根據o架，純粹講得滑稽咗少少咁解。有一位吳小姐喎，收到健身中心職員來電，話舊會員可獲贈一年免費使用健身設施會籍。點不知原來係引君入甕嘅圈套，吳小姐一現身馬上受到職員輪番上陣疲勞轟炸，結果簽約購買咗五年價值超過七萬元嘅會籍以及教練課程。要知道吳小姐係一個月入九千元嘅小職員，大拿拿七萬元卡數點還呀？冇理由一邊健身一邊賣身嘅，所以呢一位苦主好徬徨，連去健身中心嘅勇氣都冇，怕再墮入另一個消費陷阱。
根據消費者委員會嘅數字顯示，二○一一年接獲關於健身中心嘅投訴有七百零五宗，去年一月至十一月期間有三百六十二宗，主要涉及銷售手法、收費爭議以及服務質素。消委會提醒市民，車輪式推銷手法容易令消費者感受巨大壓力，或者未考慮清楚就簽約，必須多加留意提防。
其實計功夫茶話齋，類似嘅銷售手法等同搵笨，如果政府唔容許祈福黨呃神騙鬼，點解又容許健身中心氹人預繳咁多年健身費用呢？以吳小姐為例，預繳五年課程喎，邊個敢擔保五年之內健身中心唔執笠大吉？所以立法會議員王國興講得啱o架，政府對健身服務缺乏監管，應該立法加強保障消費者。
嗯……話時話，現屆政府咪成日話「民生無小事」嘅，會唔會係另一種「你呃人」嘅祈福黨式語言？咁啦，為咗證明官老爺唔係欺世盜名，一於立法防止你呃人！