政情：功能界也親民 盧偉國「財神到」
每逢過時過節，都係直選議員落區親近街坊嘅黃金時機，但世事無絕對，來自工程界功能界別嘅盧偉國（WK），尋日就專程入到大埔同街坊拜年，仲打扮成財神大派利是，誠意十足。WK扮財神，而所屬政團成員就化身成福星同壽星，齊齊向街坊大派糖果利是，而玩開音樂嘅WK仲一邊派利是一邊高唱《財神到》，唯一美中不足係佢冇黐鬍鬚，但依然氹到班街坊好開心。
EQ見識「圓籠年糕」
同樣喺尋日落區嘅議員仲有葛珮帆（EQ），佢去咗參加坑口天后宮新春團拜，最特別係見識到傳統特大「圓籠年糕」，個年糕圓周好似棵大樹咁粗，遠睇似塊大砧板。EQ話，呢底大年糕要不斷蒸足三日先至製成，今次有幸見到實在好開心。不過，咪以為底年糕得個「大」字，亦唔好以為蒸足三日一定好難食，EQ話估唔到底年糕係咁好味喎。