政情：畀靈猴摘桔 橄欖傷腦筋
猴子向來好有靈性，而且相當識食。立法會議員陳鑑林（橄欖）近日就發現有猴子「光顧」其黃大仙沙田坳道十二笏村大宅，但猴子並唔係偷佢啲桃，而係睇中佢放喺大宅門前棵大桔，佢隨即搬番棵桔入屋，又講笑怪責屋企門口狗看守失職。其實橄欖棵桔又大又靚，可能啲猴子喺冬天乾燥天氣下，忍唔住摘個桔嚟潤吓喉都未定，咪當被金猴摘個「吉」囉，幾好意頭吖！
兩會就CEPA提意見
橄欖尋日趁住年初三同傳媒拜年，席間自爆呢個「金猴摘吉」事件，又話近一、兩年都見到大宅周邊有猴子出沒，估計由於屋企附近有人晨運同行山，可能有人餵飼猴子都唔出奇。雖然橄欖因為要捍衞棵大桔而傷腦筋，但當講起個外孫時，佢就笑得好燦爛，尤其係見到外孫識得企唔使人扶時，特別開心。不過，佢就呷醋外孫開始認得人，當佢囡囡一出現，外孫就即刻想媽咪抱番。
講開三月北京嘅人大政協兩會，橄欖預告會就CEPA（《內地與香港關於建立更緊密經貿關係安排》）嘅「大門已開，小門未開」向有關方面表達意見，究竟橄欖有乜良策解決呢個問題，咁就要拭目以待喇。