政情：議員蛇年多運滯
蛇年並非選舉年，理論上立法會議員可以「蛇」吓休養生息，但事實並非如此，好多議員可能要忙於應付突如其來嘅事件衝擊。我哋今年繼續搵來預測向來準繩嘅香港術數家協會術數師楊子東，批算吓議員八字中嘅年、月、日三柱，分析吓佢哋嘅蛇年運程，發現大部分議員嘅運程都麻麻，以下會重點指出比較濕滯嘅議員運程，等佢哋可以喺蛇年之初諗計趨吉避凶。
還記得楊師傅去年批中立法會議員陳婉嫻龍年立秋後運程最差，尤其係立法會選舉有好多變數，事實證明嫻姐非但喺超級區議會選舉贏唔到「票后」，選情仲一度出現危機添。究竟嫻姐嘅蛇年運程又點呢？楊師傅話，嫻姐蛇年「沖年支大壓力，沖月支多是非」，其中以農曆六月、九月最不利，似乎預示嫻姐又要面對爭議喇。
Ann「春夏平凡冬季衰敗」
同屬建制派陣營嘅蔣麗芸（Ann），楊師傅只係贈八個字畀佢「春夏平凡，冬季衰敗」，認真耐人尋味。至於阿Ann黨友陳鑑林，楊師傅就形容佢「用木火，忌金水」，農曆七月忌神出現，之後八月「必有負面大事」，至於「負面大事」係乜意思呢？楊師傅話，其實係指「上司或長輩帶來嘅負面事」喎。
講完建制派兩大政黨政團主要人物，其他人嘅運程又點呢？獨立議員謝偉俊被批農曆七月、八月最差，其中七月仲會「必有大事發生」。鄉議局主席劉皇發同地產建造界石禮謙則要注意病魔來襲。事關楊師傅話，發叔喺蛇年春夏兩季較好，但要注意健康，尤其係心臟，同樣石禮謙要注意農曆四、五月嘅「心血眼之患」。
劉慧卿「小人是非攻身」
泛民主派方面，楊師傅坦言，白鴿黨劉慧卿同何俊仁喺蛇年同樣要小心「小人是非攻身」，其中鐵頭仁仲被批喺農曆三月開始有是非，四月仲會有「大震撼」。咁啱鐵頭仁尋日同傳媒團拜時就自爆其天后住所大裝修，所以佢喺深井租咗個複式海景單位暫住半年，有人就打趣問天后間屋係咪拆僭建，佢就講笑話係拆地下室同其他僭建喎，唔知「是非」同「大震撼」同佢住所大裝修有冇關連呢？
被視為激進派嘅社民連同人民力量蛇年運程又點呢？答案係運程認真一般。楊師傅形容，社民連「長毛」梁國雄被批喺蛇年「危機四伏」，當中農曆四月屬於高危月份，但有貴人助力可逢凶化吉，唔知咁會否造成反效果，令到長毛更有恃無恐去衝擊同抗爭呢？都係嗰句，信則有不信則無。