中環出更：黃永光揀褸 精挑細選
中國人喜歡買新衫過農曆新年，所以時裝店每逢歲晚特別好生意。卓妮過年前有日就見到一身Casual裝束嘅信和置業太子爺黃永光（Daryl），拖埋太太到金鐘太古廣場一間專賣高檔羊毛產品嘅時裝店試新衫，吸引Daryl視線嘅係店內嘅禦寒衣物，佢首先睇中一件灰色外套，試着之後與太太對鏡品評一番。
不過，只見Daryl眉頭一皺，隨即改試另一件啡色中褸，仲伸手摸摸胸袖之間嘅夾位，感覺吓剪裁夠唔夠貼身。經過一番思量後，佢似乎依然唔係咁合心意，索性將中褸放回衣架，同太太去其他店舖再睇過。
每件都「萬萬」聲
卓妮後來得悉，原來Daryl試穿嘅兩件新衫，分別係售價四萬八千元嘅上乘茄士咩羊毛鵝絨外套，同十四萬元嘅珍貴駱馬毛（Vicuna）中褸，價錢都有番咁上下，所以試清楚啲都係啱嘅。