中環出更：「小母牛」為慈善再勝一仗
沙田馬場尋日舉行蛇年賀歲盃賽事，城中名人及馬迷都趁機去沾喜氣。國際小母牛香港分會籌款委員會主席兼「快勞夾大王」杜振源（Simon）都同家人及好友入場玩，杜太曹麗明同一對仔女名下愛駒「小母牛」狀態大勇，尋日以大熱姿態跑出，不足四個月內第三次奪冠，帶挈馬會大董葉澍堃等好友發咗筆新年財。
早前Simon已捐出兩場頭馬獎金畀慈善機構小母牛，至於今次得到嘅五十幾萬獎金，佢話會繼續撥出部分捐畀「小母牛」。Simon對愛駒表現好滿意，可惜愛駒患有「喘鳴症」，唔知幾時發作，如果唔係肯定係明日之星。卓妮祝願「小母牛」身體健康，繼續為慈善而戰啦！
百仁基金主席李文俊（Raymond）夫婦都入場撐愛駒「包裝大哥」出賽，可惜三甲不入。Raymond預告百仁基金將會搞多啲青年活動，率先登場嘅係本月下旬同中大學生會合作魔術表演晚會，由籌備到表演都由同學負責，望藉此累積年輕人解決問題嘅經驗。
李運強叫咪炒樓
Raymond嘅爸爸理文造紙主席李運強都有入場湊熱鬧，對於鄉議局主席劉皇發日前到車公廟為香港求得下籤，李運強就話唔驚，佢笑言只要港人齊心團結，少啲爭拗，有乜困難都可迎刃而解。咁今年投資乜嘢好？佢強調千祈咪炒樓：「樓市已經太高，買嚟自用就冇乜所謂，炒樓就唔好喇！」如果有閒錢，可以吼吓落後股票喎。咁即係買邊隻股呢？佢就笑騎騎賣關子話：「大家各自尋寶啦！」
卓妮