財源廣進須派糖 蛇年勿再大隻講

講到發大財，都莫過於港府嘅喇，庫房財源廣進，收錢收到手軟，簡直肥到着唔到襪。呢，會計師行普遍預料，本年度政府最少有五百億元財政盈餘，同財政司司長曾俊華原本預計有三十四億元赤字，簡直差天共地。會計師行仲估計，喺樓價不斷創新高之下，政府印花稅收入水漲船高，下年度財政盈餘可能仲高過今年，即係唔止五百億元吖。

鬍鬚曾出咗名係「估錯王」，年年都話有財赤，結果年年都有大量盈餘，呢啲「狼來了」嘅把戲，大家話就話見怪不怪啫，但佢做咗財爺咁多年毫無長進不特止，仲要愈估愈荒謬，愈錯愈離譜，真係唔到你唔服！

嗱，既然庫房由預算赤字變成龐大盈餘，等於多咗一筆意外之財，而且數目唔少，當局應該識做嘞啩。點做？最簡單嘅方法就係派糖囉。家陣官富民貧，港府財源廣進，庫房水浸，而基層市民就生活艱難，度日如年，依家唔還富於民，仲要等到幾時吖。

唔係功夫茶亂噏o架，目前通脹率表面上唔係好高，實際上多數生活必需品尤其係食品加幅驚人，柴米油鹽樣樣貴，衣食住行樣樣加，對基層市民影響最大，尤其係無殼蝸牛，睇住樓價及租金係咁飆升，都咪話唔閉翳。有調查發現，市民新春消費意欲普遍較往年下降，大部分都錫住荷包，唔敢胡亂花費。值得一提嘅係，封利是嘅金額，增加同減少嘅人數居然同樣上升，反映貧富懸殊加劇，富者愈富，貧者愈貧，喺咁嘅情況下，港府更加有必要開倉派糖，扶貧紓困喇。

講開又講，澳門年年派錢，皆大歡喜，而港府咁耐以來只係派過一次錢，仲要派到七國咁亂，怨聲載道，真係丟架。有人可能唔贊成好似澳門咁樣派錢，亦有人可能唔志在嗰幾千元，問題係，除咗派錢之外，港府仲可以做乜嘢呢？仲識得做乜嘢呢？老實講吖，連長者生活津貼都搞到幾乎爛尾咁滯，港產官僚究竟有幾多能力，一眼睇晒喇。

正所謂，黃台之瓜，何堪再摘。早前公布嘅施政報告一味空談願景，被指遠水難救近火，令市民極度失望，搞到港府民望係咁跌，如果本月底出爐嘅預算案又係冇料到，市民唔反枱至奇。總而言之，財源廣進須派糖，蛇年勿再大隻講。鬍鬚曾年年估錯數，市民都唔同你計較嘞，但如果你教而不善，繼續做守財奴咯喎，咁你就唔衰攞嚟衰，市民一定同你開年o架！